Bursdagsgåve til far

Mor tipsa meg om eit par ting han far har nevnt vi treng/bør ha på hytta. Han hadde bursdag tidligare i uka, så eg såg mitt snitt.
Eg tenkte at det her er ein smal sak, og hamra i vei. Som vanleg. Slik blei det:

Ferdig knagg øvst, emnet i midten, blyant for str.forhold 

Maler knaggane svarte. 

Garving av skinn (hjort).

No er hjortejakta snart over, og vi har ein frysar full av hjorteskinn.
Desse krever litt behandling før dei kan nyttast til noko som helst, og eg begynte så smått på eine skinnet for to veker sidan.


-Trinn ein er å skrape vekk så mykje som mogleg av kjøttsida. Her kjem jobbmengda sjølvsagt an på kor god jobb han/ho gjorde som flådde dyret.

-Trinn to er å leggje skinnet i lut (her kan både oskelut og kjemisk lut brukast). Skinnet skal dekkast heilt av blandinga, og helst "rørast i" to gonger for dagen i mellom 3-7 dagar. Luten gjer at talg og kjøt (på kjøttsida) og håra og epidermis på pels-sida blir lettare å skrape vekk. Skinnet er klart til skraping når ein kan nappe av ein bunt hår utan å ta nevneverdig i.

-Trinn tre er siste del i hårfjerningsprosessen. Her skal begge sider skrapast reine for alt som ikkje er hud/skinn. Dvs talg, fett, hinner, hår, epidermis...

Her skrapast kjøttsida.

Enkel måte å "låse" skinnet for skraping.

Kar med lut (og avskrapa kjøt/talg).

Lite bilde av sjølvsmidd skrapekniv/jern i aksjon.

Hårsida skrapast.

Er ikkje ferdig før vi har rydda opp, si.

Per no ligg skinnet, ferdig skrapa, i frysaren. Neste prosess er å fette skinnet. Viss det er lov å si.
Her trengs hjernemasse. Gjerne masse. Om nokon har til overs er det bare å gje ein lyd.
Bilder kjem som vanleg sånn rett før du minst ventar det.

Smidde skrapejern/ skrapeknivar

No er hjortejakta godt igang, og skinn drysser på greie frøkner og herrer. Vi har eit par hjorteskinn liggande på frys, i tillegg til nokre hjortebein. Hjortebeina skal brukast til sitt, og senene til sitt.
Men uansett, dette blir det mulig eit eige innlegg av.
No er det skinn det er snakk om. Og håra og epidermis skal skrapast av. Vi har ein skrapekniv i bein som vi fekk i gåve frå Kuttelo (steinaldergruppe frå Finland), men vi treng fleire verktøy, slik at fleire kan jobbe samstundes.

Desse jerna skal ikkje være skarpe (, men heller ikkje heilt butte) slik at dei ikkje øydelegger skinnet med kutt. Dei skal kun brukast til skraping.

Her er iallefall litt bilder av dagens produksjon.

Underarmsbeskytter av skinn

Første del av `Henrik lagar ting for første gong`;

Eg fekk kjøpe eit stykke skinn av Stein for ei stund sida, øyremerka armbekyttar, og no har tida komen. Endeleg har eg tid til å byrje på slikt.


-Første eg gjorde var å sage ut knappar av eit reingevir, og bore hòl i dei.
 (4 stk skal vere nok til ein armbeskyttar, men er no greit å ha litt ekstra. Sånn viss,om og men.)

Ferdige knappar

-Deretter lagast mal, og skinnstykket skjærast ut.

Omtrent slik.

                         

Vidare:


-Knappane syast på med lintråd/senetråd.



-Skinnremser til snøring klippast/skjærast til og "herdast".

Ja, der ser du. Ting tok alt for lang tid (mange jern i ilden), så eg gjorde det enkelt, for enkelhets skyld. Ferdig! Ta-daa!

Bålstativ

No når eg har smidd meg S-krokar er dette neste prosjekt på plakaten. Slik ser det i allefall ut.

Å rette ut ei bilfjør tar tid, gitt. 

Eine enden splittast med meisel. 

Andre enden får eit auge. 

Tre slike bein = Bålstativ. Det som gjenstår er å lage auger i dei to siste stengene/føttene, og å smi "låsepinne"/krok. Denne ser eg fram til å lage. Bilde kjem, som vanleg, brått og uventa.

Brygging av mjød, batch #1 (Oppdatert 27.10.14)

Dagen kom endeleg. Vi (Bjørn, Paul og eg) har sett fram til dette. Paul har honning og rips, Bjørn har gryte, brennar, bringebær og erfaring, eg har bil, propan, bikkje og arbeidslyst. Vi bringa alle vårt til bordet. Ikkje bikkja, forresten. Ho tok det heile med knusande ro.

Uansett... Noko oppskrift vil ikkje bli lagt ut her, men framgangsmåte skal bli. Om nokon lurer på smakstilsetjing er det bare å spørre. Blandingsforholdet honning/vatn ≈ 1/1. "Epic Iron Age Shitfaced" heite det.

Oppkoking av vatn. 

Honning rørt inn, og tilsatt bringebær. 

 Etter tilsetjing av bringebær splitta vi vaniljestang og heiv oppi. Til slutt blei ein del rips tilsatt. Dette heldt vi på koketemp ei lita stund, før vi bråkjølte (og skaut litt med pilabue og kasta med øks).

Deretter var det å tappe i kvar sitt gjæringskar og fortsetje jobben heime.

Dunken er i hus, og er no på 24 liter. Sukkerlake og gjær + gjærnæring er gjort klar, og vil bli tilsatt i ettermiddag. (13.09.)

Ferdig sukkerlake 

Oppdatering, 27.10.14:

Det bluppar framleis lystig i dunken. Det nærmar seg tapping og langtidslagring, men gjæra skal få gjøre seg ferdig først.

 Eg er uhyre spent på korleis brygget vil bli. Det vitast neste haust.

YouTube-link til artilleriskyting på Bergenhusdagane

Eg legg ut ein link her, sia det ikkje er eg som har tatt videoen. Eg meiner det er Lena frå Fortidsfamilien som har filma.

Pilregn på Bergenhusdagene 2014: Klikk her.

Fleire bilder og kanskje litt film er å finne. Kanskje på Bymuseet sine nettsider, Stig sin handverksblogg kan ha noko, evt bruk Google til det det er meint for.

Lykke til.

Bilde av nokre i laget på ei øving

S-krokar i jern

S-krokar går det mykje av, og i, på marknader rundtomkring. I tillegg treng eg eit par sjølv.
Så då var det bare å begynne.
(Bålstativ er neste prosjekt.)

Handverkslaget på Bergenhusdagane

Handverkslaget har tatt på seg å drive litt underhaldning under viking og middelaldermarknad/festival. Vi vil vise artilleriskyting med bue samt historiske pilspissar sin effekt på div beskyttelse.

Til artilleriskytinga har vi no ferdigstilt 100 piler. Dei skal lakkast neste tirsdag (02.09.), og så er dei "good to go".

Storstilt produskjon. Her limast fjær på pilskafta.

Ein liten del av ferdige piler.

Første prøveskyting. 75 meter.

Her er ein link til ein "Facebook-teaser" som Stein i Handverkslaget har laga. Kos dykk.

___________________________

Trebuchet:
I fjor bygde Bjørgvin Handverkslag trebuchet'en Magnus for å syne fram beleiringsteknikkar frå rundt 11-1200-tallet. Denne typen kastemaskin er laga for å kaste prosjektil som stein, jernkuler (og hodekål, mest sannsynleg som ein type tidleg nødhjelp i perioder med mykje hungersnød og pest... eller ikkje) over murane til motparten. Andre maskiner vart brukt når det var snakk om å knuse murane rundt ei borg eller ein by. No i helga, under Bergenhusdagane, kasta vi 20 hodekål 75-80 meter utover Koengen. Hadde vi vore 8 mannfolk til å trekke, i tillegg til å lade med nokre halvkilos jernkuler, ville vi kunne gjere det bra utriveleg i hin enden, og kasta prosjektila mykje lenger.

Den legendariske kastemaskina 'MAGNUS'.

MAGNUS, degradert til langbuestativ.

Artilleriskyting:
Etter 4-5 kast med Magnus, med litt hjelp frå små og store hjelpevillige frå publikum, stilte vi opp ei linje med 8 langbueskyttarar. Vi fyrte av garde 5 seriar med kommandoane: PIL - TREKK - HOLD - SLIPP, for så å skyte fritt "så langt lageret rakk". Vi skaut då på samme avstand som med Magnus. Markørar var sett ut til formålet, og målet var å ha ei stor samling piler rundt markøren på 76 meter.

Eg har diverre ingen bilder av skyttarlinja, då eg var med i den sjølv. Mogleg eg får tak i dette om litt.
Her er link til Lena (Fortidsfamilien) sin Youtube-kanal, der du kan finne små klipp frå helga: Trykk her.

Vi har i alle fall fått gode tilbakemeldinger på underhaldninga, både frå publikum og arrangør.

Gode ting!

Handtak til smed-kiste

Hengslar har eg smidd tidligare, no treng eg kun handtak på sidene. Desse smidde eg idag.
Dei ser nøyaktig slik ut: